Қарағандыда
  • USD 360.12
  • EUR 409.67
  • RUB 5.33
Қала әкімдігінің ресми интернет ресурсы

Ақпарат орталығы

ГлавнаяАқпарат орталығы

    Елбасы еліміздің солтүстік өңірін аралап қайтты

    Мемлекет басшысы кәсіпорынның цехын аралап көріп, майлы дақылдарды өңдеудің және тазартылған майды өндірудің технологиялық процесімен танысты.

    – Сіздердің инвестицияларыңыз қайта өңдеу өндірісіне алғаш рет тартылып отыр. Бұл Қазақстанның аграрлық кешеніне қосылған маңызды үлес болып саналады. Мұнда өндірілген бүкіл өнім сыртқы нарыққа шығарылып, еліміздің экспорт көлемін ұлғайтуға, жаңа жұмыс орындарын ашуға және табыс табуға септігін тигізеді. Осының бәрі өте маңызды, – деді Қазақстан Президенті.

    Кәсіпорынды аралап көргеннен кейін өңір әкімі Құмар Ақсақалов Солтүстік Қазақстан облысының биылғы бірінші жартыжылдықтағы әлеуметтік-экономикалық даму қорытындылары жөнінде баяндады. Нұрсұлтан Назарбаев еліміз бойынша топырағы ең құнарлы әрі ауыл шаруашылығы үшін жері қолайлы саналатын Солтүстік Қазақстан облысы аграрлық салаға дәстүрлі түрде маманданғанын айтып, Қазақстанда өндірілетін астықтың төрттен бір бөлігі осы өлкеге тиесілі деп атап өтті.

    – Мұнда ауыл шаруашылығының әлеуеті әлі де тиісті дәрежеде пайдаланылып отырған жоқ. Бұл ретте, облыс егіншілері, сөзсіз, жер өңдеу, астық өндіру ісінде жоғары деңгейдегі мамандар болып саналады. Сондай-ақ, мал шаруашылығы саласын дамытумен де айналысу керек, – деді Мемлекет басшысы.

    Сонымен қатар, аймақ басшысы Қазақстан-Ресей XV өңіраралық форумын өткізуге дайындық барысы жөнінде мәлімдеді. Қазақстан Президенті ауыл шаруашылығына ғылыми жетістіктер мен цифрландыру үдерісін енгізу, шекаралас өңірлермен ынтымақтастықты жандандыру, өнеркәсіп өндірісі мен туризм саласын одан әрі дамыту, сондай-ақ өңірдің инвестициялық және іскерлік тартымдылығын арттыру арқылы облыстың аграрлық әлеуетін кеңейту жөнінде бірқатар тапсырма берді.

    – «Бес әлеуметтік бастама» осы мәселелерді шешуге септігін тигізу қажет. Оның жергілікті деңгейде сапалы жүзеге асырылуын қамтамасыз ету керек, – деді Нұрсұлтан Назарбаев.

     «Тайынша май» ЖШС-і өңірдің ауыл шаруашылығы кластеріндегі ең ірі кәсіпорындардың бірі болып саналады. Зауыт Еуропада жасалатын заманауи құралдармен жабдықталған және тәулігіне 1000 тонна шикізат өндіруге мүмкіндігі бар. Кәсіпорында 46 адам жұмыс істейді.

    Мемлекет басшысы Қазақстанның басқа өңірлерінен қоныс аударғандарға арналған 14 тұрғын үйдің құрылысымен танысты.

    Нұрсұлтан Назарбаев көшіп келген отбасылармен әңгімелесу барысында қоныс аударған тұрғындарға мемлекет тарапынан барлық жағдай жасалып жатқанын атап өтіп, өзінің де өмір жолы туралы айтып берді.

    – Менің Алматы қаласының маңында дүниеге келгенімді білесіздер. 17 жасымда туған өлкемнен ұзап кеттім. Мен осындай шешім қабылдап, түрлі өңірде еңбек жолынан өттім. Кездескен қиындықтарды жеңіп, бүгінгідей дәрежеге жетіп отырмын. Сіздер мұны балаларыңыздың болашағы үшін жасап жатырсыздар, – деді Қазақстан Президенті.

    Соңында Елбасы ауылдың жаңа тұрғындарына зор денсаулық, табыс, бақ-береке тіледі.

    Жалпы, 2018 жылы Солтүстік Қазақстан облысына 900-ге жуық адамды қамтитын 235 отбасы көшіп келген. Барлығы жалдамалы пәтермен қамтамасыз етіліп, жұмысқа орналастырылды. Олардың көшіп келуі және шығындарының өтелуі үшін 1 миллиард теңгеден астам субсидия бөлінді.

    Елбасы облыстың ауыл шаруашылығы алқабын аралап көріп, егін ору науқанына дайындық барысымен танысты, сондай-ақ биыл Солтүстік Қазақстан облысының мол астық жинайтынына сенім білдірді. Қазақстан Президенті өңір шаруаларымен әңгімелесу барысында ауыл шаруашылығы өндірісін әртараптандырып, мал шаруашылығын дамыту қажеттігін атап өтті.

    – Бұл жетістіктермен тоқтап қалмай, өндіріске ғылыми және цифрлық технологияларды енгізу керек. Қайта өңдеу саласын дамытпай, еңбек өнімділігін арттыру мүмкін емес, – деді Нұрсұлтан Назарбаев.

    Кәсіпорындар жетекшілері еліміздің ауыл шаруашылығы өнімдерін өндірушілер мен аграрлық секторға мемлекет тарапынан қолдау көрсетіліп жатқаны үшін Қазақстан Президентіне алғыс білдірді. Сонымен қатар, Мемлекет басшысы облыс зауыттарында құрастырылатын тракторлар, комбайндар және басқа да астық жинауға арналған техникалар қойылған ауыл шаруашылығы көрмесін аралап көрді.

    Осы сапар барысында Елбасы Нұрсұлтан Назарбаев Ақмола облысының да шаруалары мен дихандарымен кездесті. 

    Мемлекет басшысы дәнді және майлы дақылдар алқабын аралап, егін ору науқанына дайындық барысымен танысты.

    – Астықтың уақтылы жиналуын қамтамасыз ету қажет. Бізге ауа-райы қолайлы болып тұр. Егін ору уақытының созылуы едәуір шығын келтіретіндіктен, бұл жұмыстарды жеделдету керек, – деді Елбасы.

    Нұрсұлтан Назарбаевқа Ақмола облысының әлеуметтік-экономикалық дамуының негізгі нәтижелері мен ауыл шаруашылығы саласының перспективалары жөнінде мәлімделді. Қазақстан Президенті агроөнеркәсіп кешеніне озық ғылыми жетістіктерді және цифрландыру үдерісін енгізудің маңыздылығын атап өтті.

    – Шортанды ауданында тәжірибе ретінде алқаптардың электронды картасын енгізу, егістік жағдайына спутниктік мониторинг жасау, тұқымды ретімен егіп, тыңайтқыштарды дифференциалды түрде себу жұмыстары жүзеге асырылуда. Бұл еңбек өнімділігін 2 есе арттыруға, сондай-ақ шығынды 20 пайызға төмендете отырып, астық өнімділігін 5 центнерден асыруға мүмкіндік береді, – деді Мемлекет басшысы.

    Сонымен қатар, Елбасы Қазақстанда және шетелде құрастырылатын техникалардың үлгілері қойылған ауыл шаруашылығы машиналарының көрмесін аралап көрді.