• 4638 барлығы
  • 26 бір айлық
  • 0 апта ішінде

Ақпарат орталығы

Қазақстан - Корея Республикасының Шығыс Азиядағы негізгі стратегиялық әріптесі

Екіжақты кездесулер аясында қазақстандық-корейлік  сауда-экономикалық ынтымақтастықты дамыту, бірлескен  халықаралық шаралар тізімі мен  жаһандық және өңірлік күн тәртібін талқылау жоспарланған еді.

Мысалы, Корея Республикасының Сыртқы істер министрі Кан Ген Хва ҚР Сыртқы істер министрі Қайрат  Әбдірахмановпен кездесуінде екіжақты ынтымақтастық пен өзекті мәселелер талқыланды.

Министр Қайрат Әбдірахманов Корей түбегіндегі ахуалды, сондай-ақ саяси-экономикалық, әлеуметтік және басқа да өзара қатынастардың перспективалары сөз болғанын айтты.

Сонымен қатар, 2016 жылдың қараша айында ҚР Президенті Нұрсұлтан Назарбаевтың Сеулға жасаған мемлекеттік сапары ынтымақтастықтың жаңа белесі болғандығы айтылды. Оған қоса, Қайрат Әбдірахманов екі ел ұстанымдарының ұқсас екенін жеткізіп,   Қазақстан - Корея Республикасының Шығыс Азияда негізгі стратегиялық әріптесі екенін айтты.

«Қазіргі таңда Астана мен Сеул арасында халықаралық өзекті мәселелерге қатысты ұстанымдарымыздың ұқсас екені байқалып отыр. Оны ерекше атап өткім келеді. Халықаралық ұйымдар мен көпжақты форумдар аясында өзара жағымды іс-қимылдар дамып келеді. Бүгінгі келіссөздер ортақ мақсаттардың бар екенін тағы да бір дәлелдеді және елдеріміздің көптеген саладағы ынтымақтастығын тереңдетуге өзара қызығушылықты да растады. Қазақстан мен Корея Республикасы достық пен өзара қарым-қатынас рухына негізделген. Оң және берік қатынастарды дамытуды жалғастыруға бел буып, оны жан-жақты дамытып, біздің халықтарымыздың игілігі үшін сақтап қалуға барлық күш-жігерімізді жұмсаймыз», - деді министр Қ.Әбдірахманов.

Сонымен қатар, екі ел арасындағы «Төртінші өнеркәсіптік революциядағы» ақпараттық- коммуникациялық, цифрландыру бағыттары туралы айтылды.

Сауда-экономикалық қатынастар, оған қоса көлік-логистика жағдайлары талқыланды. Ал, саяси бағытта келісе отырып шешуді талап ететін бірқатар мәселе, оның ішінде консулдық және қазақстандық инициативаны жетілдіру, сондай-ақ халықаралық бірлестіктердің кандидатуралары туралы сөз қозғалды.

 «Қазақстан Корейаралық диалогтың қалпына келуін және Корея Республикасымен КХДР-дың бірігіп, Саммит өткізуін қолдайды. Астана алда өтетін Корейаралық Самиттен үлкен үміт күтеді», -деді ҚР ведомство басшысы.

Ал, Корея Республикасының сыртқы істер министрі Кан Ген Хва бүгінгі кездесу ол үшін үлкен құрмет екенін атап өтті. Сондай-ақ, Астананың 20 жылдығындағы таңғаларлық өзгерісіне тәнті болғанын айтты.

«Қазір екі елдің тауар айналымы 1992 жылдан бері 150 есе ұлғайды. Казақстан мен Корея Республикасы 2009 жылдан бастап стратегиялық әріптес болды. Президент Нұрсұлтан Назарбаевтың 2016 жылдың карашасында біздің елге жасаған сапары екі елдің қатынасын одан әрі жандандыра түскендей. Ол кездесуде көптеген келісімге қол қойылды. Энергетика, табиғи ресурстардағы серіктестік одан сайын артуы тиіс. Біз «Төртінші өнеркәсіптік революция» аясында Қазақстанмен әріптес ретінде жұмыс істеп жатқанымызға қуаныштымыз», - деді кездесу барасында министр Кан Ген Хва.

Айта кетейік, бүгін  Корея Республикасының Сыртқы істер министрімен Елбасы Нұрсұлтан Назарбаев та кездескен болатын.

Кездесу барысында тараптар ынтымақтастықтың өзекті мәселелерін және екі ел арасындағы сауда-экономикалық қарым-қатынастардың даму перспективаларын талқылады.Нұрсұлтан Назарбаев Корея Республикасының Сыртқы істер министріне ілтипат білдіріп, екіжақты байланыстардың сенімді сипатқа ие болып отырғанын атап өтті.

«Астана мен Сеул арасында сенімге негізделген достық қатынас орнап, экономикалық ынтымақтастық қарқынды дамып келеді. Экономикалық және гуманитарлық өзара ықпалдастықтың көптеген мәселелері шешімін табуда. Сіздердің Орталық Азияда жүргізіп жатқан белсенді жұмыстарыңызды қолдаймыз», – деді Қазақстан Президенті. 

Айта кетейік,  екі ел арасындағы ынтымақтастық  1992  жылы  28 қаңтарда  орнатылды.1993 жылы  Корея Республикасының Қазақстан Республикасындағы Елшілігі ашылды.1996 жылы  Қазақстан Республикалының Корея Республикасында Елшілігі ашылды. 2012 жылы   наурыз айынан бастап Д.Бакишев Қазақстанның Корея Республикасындағы Елшісі болып тағайындалды.2017 жылы  сәуір айынан бастап Ким Дэ Сик Корея Республикасының Қазақстандағы Елшісі болып тағайындалды.

Аягөз Құрмаш