Қарағандыда
  • USD 383.01
  • EUR 430.12
  • RUB 6.10
Қала әкімдігінің ресми интернет ресурсы

Ақпарат орталығы

ГлавнаяАқпарат орталығы

    Қазақстан нейрохирургиясы жыл сайын 3000 операция жасайды

    Ұйымдастырушылардың айтуынша, съезд барысында Қазақстанда алғаш рет балалар нейрохирургиясы бойынша  халықаралық қоғамдастықпен (ISPN) ұйымдастырылған ресми мектеп өткізіледі екен. Бұл беделді ұйым жыл сайын әлем бойынша бірнеше ғана мектеп өткізеді. Ал, бүгін Орта Азия, оның ішінде Қазақстанға арнайы келіп мектеп өткізуі, біздің еліміз үшін үлкен мәртебе әрі осы шараға қазақстандық мамандардың үлесі де жоқ емес.

    Жиында мамандар елімізде жылына 500-ге жуық бала нерв жүйесінің күрделі ауытқушылығынан ем қабылдайтыны туралы мәлімет берді. Жалпы алғанда бұл диагноз бойынша 11 жылда 5 мың кішкентай пациентке операция жасалыпты. Сонымен қатар, бас қосудағы нейрахирургтер гидрацифолия, дамудың туа біткен кемістіктері, жақап, бас және жүйке жүйелерінің ауытқулары, нейраонкология, функционалды нейрахирургия сынды мәселелер бойынша талқылау өткізіп жатыр.

    Балалар нейрахирургы Гаухар Ибатова бұл конференциядан өте пайдалы ақпарат алып, алыс-жақын шетелден келген мамандармен тәжірбие алмасу мүмкіндігі барын айтты.

    «Бүгінгі болып жатқан халықаралық конференция тек Қазақстанның нейрахирургтарына ғана сабақ болайын деп жатқан жоқ. Себебі бүкіл әлемде болып жатқан жағдайларды ортаға салып талқылап, яғни қандай мәселелер бар, қандай қиын жағдайлар болады, әр нейрахирургтың алдында қандай жұмыстар бар. Осы мәселелерді талқылау ретінде өтіп жатыр», - деді ол.

    Нейрохирургия орталығы балалар бөлімінің ординаторы Әлібек Жарасов аурудың пайда болу себептеріне түсінік берді.

    «Менің бақылауымша, балалар нейрахирургиясындағы аурулар – бұл көбіне туа бітті пайда болған болып келеді. Ондай балалардың ішінде көбіне краниостеноз диагнозны өте жиі қойылып келеді», - деп алаңдаушылық білдірді Нейрохирургия орталығы балалар бөлімінің ординаторы Әлібек Жарасов.

    Краниостеноз немесе краниосиностоз балалардағы бас сүйек патологиясы болып табылады. Бұл ауру, ең алдымен, бас  сүйектерінің дұрыс емес немесе мерзімінен бұрын бітіп кетуіне байланысты баланың бас сүйегі деформациясымен сипатталады. Краниосиностоздың негізгі салдары косметикалық сипатта болады - бұл бастың немесе бет ерекшеліктерінің, ұзартылған немесе керісінше қалыптасуы, бас сүйегінің майысқандығы және басқа да қалыпты жағдайдан тыс өзгерістер.

    Дәрігерлердің айтуынша, бұның пайда болу себептері де әртүрлі. Көптеген жағдайларда ақаулы гендер немесе тұқымқуалайтын патологиялар (Крузона, Пфайфера и Аперта синдромдары) әсер етеді. Сонымен қатар, туа біткен баланың түрлі ішкі ауруларының да әсері жоқ емес. Ал, краниостеноз баланың психикалық немесе физикалық дамуының сапасына мүлдем әсер етпейді.

    «Сонымен қатар поликистоздардың асқынуынан пайда болатын туабітті гидроцефолия диагнозы да жиілеп кетті. Бұның себебі мен салдары тура кесіп бірдеңе айту мүмкін емес. Әрі бұл бір ғана фактордың кесірінен ғана емес, оған бірнеше фактор әсер етуі мүмкін. Ең алдымен ол экологияға байланысты болуы керек. Содан кейін әрине, қазір тұтынып жатқан тамақтарымыздың бәрі табиғи, таза өнім деп айта алмаймыз. Оның да әсері жоқ емес. Осының бәрі жиналып келіп, балаға әсер етеді. Сондай-ақ тағы ескеретін нәрсе, болашақ ата-аналар баланы дүниеге әкелуі жақсы дайындалмауы мүмкін. Бұл да болашақ сәбидің денсаулығына айтарлықтай әсер етеді», - деді нейрохирургия орталығы балалар бөлімінің ординаторы Әлібек Жарасов.

    Балалар нейрохирургтарының еуразиялық қауымдастығының алғашқы, яғни I съезі 2017 жылы Минск қаласында (Беларусь Республикасы) өткізілген болатын. Кезекті съезде осындай іс-шараларды өткізу және  Еуразия аймағындағы балалар нейрохирургиясының дамуының келешегі мен өзекті сұрақтарды талқылаудың алаңына айналды.

    Қазақстан астанасында өтіп жатқан балалар нейрохирургтарының еуразиялық қауымдастығының II съезінің ғылыми бағдарламасы балалар нейрохирургиясы саласындағы аса маңызды мәселелерді талқылауға  арналып, әр тақырып бойынша, яғни гидроцефалия, дамудың туа біткен кемістіктері, жарақат, нейроонкология, функционалды нейрохирургия  және тағы да басқа тақырыптар бойынша пленарлық сессия өткізу жоспарланған.

    Ұйымдастырушылардың сөзінше Қазақстанда Балалар нейрохирургтарының еуразиялық қауымдастығының II съезін өткізу отандық мамандарға қазіргіден де көп мүмкіндіктер береді, яғни аталған бағытта тәжірибе алмасу, жаңа біліммен бөлісу, әріптестермен танысу. 

    Съезд жұмысына қатысу үшін қазақстан астанасына 15 мемлекеттен: Қазақстан, Ресей, Белоруссия, Армения, Украиня, Германия, Бразилия, Израиль, Қытай, АҚШ, Грузия, Өзбекстан, Молдова, Тәжікстан, Қырғызстаннан 250-ден аса мамандар келгенін айта кетейік.

    Мемлекет Басшысы 2019 жылды Қазақстандағы Жастар жылы  деп жариялағаны баршамызға аян. Жас мамандарға қолдау көрсету үшін Съезді өткізу шеңберінде жас нейрохирургтар баяндамаларының байқауын да өткізу жсопарланып отыр. Сондай-ақ, аталған байқауға нейрохирургия саласындағы үздік баяндамаларымен жақын және алыс шетелдерден жас дәрігер нейрохирургтар қатысады. Іс-шара ұйымдастырғандар: «Қазақ нейрохирургтар  Ассоциациясы» қоғамдық бірлестігі мен  «Ұлттық нейрохирургия орталығы» АҚ.

    Жыл сайын Қазақстандағы жалғыз Ұлттық нейрохирургия орталығында ересектер мен кішкентай пациенттерге 3000 –нан аса операция жасалып, соның ішінде жыл сайын нерв жүйесінің  ең күрделі патологиясы бар 500 –дей бала орталықта жоғары білікті нейрохирургиялық көмек алады. 11 жыл ішінде Орталықта 5000 –дай  бала ем қабылдаған және орталық нерв жүйесінің дамуының ауытқуларын, функционалды нейрохирургия, ми ісіктерін  нейронавигация, интраоперациялық нейромониторинг, эндоскопиялық, эндовоскулярлық құрал-жабдықты қолданумен  4000 –нан аса операция жасалған. Ұлттық нейрохирургия орталығы болмаған кезде еліміздегі науқастардың шамамен 10 процентінің ғана шетелге барып нейрохирургиялық көмек алуға мүмкіндігі болған. Ал оған қолы жетпеген қалған 90 пайыз пациенттер үйлерінде өмірінің соңын күткен екен. Қазіргі таңда емханаға 70-ке жуық жаңа технологияларды енгізіп, дәрігерлердің әрқайсысы 500-ге дейінгі пациентті емдеп шығарып отыр. Алғашқы жылы 500 операция жасалынса, қазір жылына 3250 операция жасауға мүмкіндіктері бар. Ал осының 80 проценті бұрын тек шетелге барса ғана емделетін ауру түрлері болып келген. Бүгінгі таңда Орталық пациенттерді диагностикадан өткізуден  бастап ерте оңалтумен аяқталатын медициналық қызметтердің толық спектрін көрсететін Қазақстандағы мамандандырылған жалғыз клиника.

    Айдана Абдрахманова

    Барлық материалдарды t.me/strategykz telegram аккаунтынан оқи аласыздар.