Қарағандыда
  • USD 361.15
  • EUR 414.71
  • RUB 5.53
Қала әкімдігінің ресми интернет ресурсы

Ақпарат орталығы

ГлавнаяАқпарат орталығы

    Инвестиция- жастарға: Азия-Тынық мұхиты аймағы жастарының дамуы қалай жүзеге асырылуда

    Ресми статистикаға сәйкес, Қазақстанда биыл  14-29 жас аралығындағы жастардың саны  4 млн-ға жетті.  Биылғы жылдың екінші тоқсанында Қазақстанда  15-28 жас аралығындағы жұмыспен қамтылған халық саны  2038,8 мың адамды құрайды. Жастар арасындағы жұмыссыздық деңгейі  3,9 пайызды құрап отыр. Жастарды жұмыспен қамтуды жеңілдету  және білім алу  мүмкіндігін арттыру мақсатында елімізде бірқатар жастар бағдарламасы мен  жобалары жүзеге асырылуда.

    Парламент Мәжілісі төрағасының орынбасары Гүлмира Исимбаева «Инвестиция-жастарға. Ешкімді тыс қалдырмайық» халықаралық конференциясында Елбасының Жолдауында жастарға ерекше көңіл бөлінгенін атап өтті.

    «Конференцияға  әлемнің  35 елінен  100 қатысушы келіп отыр. Күн сайын әлем  жылдам әрекет етуді талап ететін  жаңа жаһандық сынақтарға тап болады. Әлемнің болашағы қазіргі жастардың   бітімгершілік  ұстанымдары  мен  білім деңгейі, зияткерлік мәртебеге тәуелді болып отыр.  Осы орайда парламентшілер мен сарапшылар қауымдастығының алдында  жастардың проблемаларын шешу үшін тиімді шараларды жоспарлау мақсаты тұр. 2 күн бойы өзекті мәселелер кешенін қарап, елдердегі жастар саясатын одан әрі дамытуға ұсыныстар әзірлейміз», - деді Г.Исимбаева.

    Бір жыл бұрын аталмыш конференцияны Астанада  өткізу  бастамасын қолдаған Мәжіліс Төрағасы Нұрлан Нығматулин  әрбір мемлекет пен қоғамда жастардың орны ерекше екенін атап өтті.

    «Қоғамның, ұлттың болашағын айқындайтын ол – біздің жастар. Сондықтан да Қазақстан Президенті Нұрсұлтан Назарбаев Тәуелсіздік алған күннен бастап жастарға үлкен көңіл бөліп келеді. Барлық жағдай жасалып жатыр, олардың барлығын заң жағынан қолдау үшін Парламент тарапынан атқарылып жатқан жұмыстар да аз емес. Мысалы, мемлекеттік жастар саясаты мен волонтерлік қызмет туралы заңдар қабылданды. Биылғы Жолдауда тағы да осы мәселеге ерекше назар аударылды. Жастар саясатына қатысты бірқатар тапсырмалар берілді. Олардың барлығы жастардың рөлін арттыруға, өмір сапасын жақсартуға және бәсекеге қабілеттілікті күшейтуге  жаңа серпін беретіні сөзсіз», - деді Н.Нығматулин.

    Сондай-ақ, Мәжіліс Спикері жастардың әлеуметтік құқықтарын қамтамасыз ету, олардың шығармашылық әлеуетін арттыру, табыстық дамуына жағдай жасау әрқашан да мемлекеттің назарында екенін баса айтты.

    «Қазақстандық жастарға сапалы білім алу үшін жақсы жағдай жасалған. Өзін-өзі дамыту мен шет тілдерін үйрену бойынша ешқандай шектеу жоқ. Бүгінде елде жоғары әрі ЖОО-дан кейінгі білім беру дамып жатыр. Сонымен қатар, әлемнің ең үздік университеттерінің қатарында 2017 жылы 8 қазақстандық  ЖОО аталып өтті. Астанада бірегей білім беру орталығы  Назарбаев орталығы бар екенін атап өткен жөн. Ол 21-ғасырдағы қазақстандық білім беру метебінің үлгісіне айналды», - деді Н.Нығматулин.

    Өз кезегінде  аталмыш шараны өткізуге үлес қосқан Азия халықтың қоныстануы және даму қауымдастығының  төрағасы Ясуо Фукуда бүгінгі таңда Азиядағы жастар сегменті ауқымды екенін атап өтті.

    « Жастардың білім алуы мен жұмысына дұрыс бағыт көрсету халық алдындағы проблеманы шешудің бір бөлігі болып табылады. Жастар экономиканың дамуына үлес қосатын ең маңызды демографиялық бөлік. Ол жаңа идеялар ұсынып, бастамаларды жүзеге асыруға құқылы. Жастарды қажетті оқу мен жұмыс орнымен қамтамасыз етсек, бұл прогресске апаратын үлкен серпін береді. Бұл мүмкіндікті игере алмасақ, әлеуметтік қамсыздандырмау мен тұрақсыздықтың факторына айналуы мүмкін. Сондықтан да, барлық өңірлерде  жастарға инвестиция құю маңызды әрі қажет. Болашақта Азия Тынық мұхиты аймағының жастары тұрақты дамудың қозғаушы күшіне айналады», - деді Ясуо Фукуда.

    Ал, Қазақстанда жастарды дамыту  бойынша қандай нақты бастамалар жүзеге асырылып жатқаны туралы  Қоғамдық даму министрі Дархан Кәлетаев айтып берді.

    «Адами капиталды дамыту жаһандық тренд, оның негізгі құрамы жастардан тұрады. Олар ауқымды салым мен инвестицияны аталап етеді. Қазақстанда жастар саясатын жүзеге асыруға бағытталған концептуалды заңдар  әзірленген. Қажетті инфрақұрылым да жасалған. Жастар бойынша барлық проблемалық мәселелерді шешетін орган Президент жанындағы жастар саясаты жөніндегі кеңес. 1993 жылдан бастап «Болашақ» бағдарламасы жұмыс істеп тұр. Осы жылдары  13 мыңнан астам жас азамат  шетелде білім алды.  Биылдан бастап жастар  тегін  техникалық  және кәсіптік білім алу мүмкіндігіне ие болды», - деді министр.

    Сондай-ақ, қыркүйектегі есеп бойынша «Еңбек» бағдарлмасына қатысушылардың саны  150 мыңға, «Дипломмен ауылға» бағдарламасы бойынша белсенді жастардың саны артты.

    «Жүргізіліп жатқан жұмыстар білім беру индексі бойынша әлем бойынша  35-ші орынды иемденуге мүмкіндік берді. Жастарды дамытудың  жһандық индексі бойынша Қазақстан  180 елдің ішінен  61-ші орынға ие болып отыр. Сондай-ақ, елімізде  жастар арасындағы  суицид көрсеткіштер төмендеп келеді», - деді Д.Кәлетаев.

    Өз кезегінде БҰҰ-ның Халықтың қоныстануы саласындағы қорының Шығыс Еуропа және Орталық Азия елдері үшін өңірлік директорының орынбасары Ян МакФарлейн жастар маңызды рөлге ие екенін барлығы білетінін жеткізді.

    «Кез келген елдің бағыттары мен ұстанымдары жастардың  барынша қатысуымен ғана  іске аса алады. Конференцияның өтуі де сол үшін өте өзекті болып отыр. Біздің қабылдайтын шешімдеріміз бен бағытымыз өте тиімді болады деген ойдамын. Жастар нақты әрі түсінікті маңызға ие», - деді ол.

    Я.МакФарлейн жастардың бала кезден бастап дұрыс жолды таңдауына оң әсер ету барлық теріс істің алдын алудың жолы екенін атап өтті.

    Аталмыш шараға тәжірибе алмасуға келген  Әзірбайжандағы жас дипломаттарды қолдау қоғамдық ұйымы  төрағасының орынбасары, «Жаңа Әзірбайжан»  партиясы жастар қанатының  жергілікті органы төрағасының орынбасары  Азад Абиев  Әзірбайжандағы жастар саясаты қалай жүзеге асыралып жатқанымен  бөлісті.

    «Елдегі  жастар саясаты  Президент Илхам Әлиевтің бастамасы  бойынша белсенді жүзеге асырылып жатыр. Мен «Жаңа Әзірбайжан» жастар қанатының белсенді мүшесімін. Кавказдағы ең ірі  «Жаңа Әзірбайжан» партиясының құрамында 600 мыңға жуық адам болса, оның 40 пайызын жастар құрап отыр.  Осы көрсеткіштің  өзі елдегі жастардың белсенділігін көрсетеді.   Былтыр  Президентіміз жастар саясаты бойынша мемлекеттік бағдарламаны қабылдаған болатын. Мемлекет жастарға үнемі қолдау көрсетіп отырады. Жастарға, тіпті студент емес жеке секторда жұмыс істейтін жастарды қамтитын шараларды  ұйымдастырып отырамыз. Демек, біз жастардың барлық сатысын қамтуға тырысамыз», - деді  Азад Абиев.

    Оның айтуынша, әрбір жас азаматтың алға дамып, ілгерілуіне мемлекет қолдау  көрсетуге міндетті. Сондай-ақ, ол жастарға бизнес саласы бойынша да қолдау көрсетілетінін жеткізді.

    «Экономика министрлігі аясында кәсіпкерлікті қолдау қоры бар. Кез келген жас кәсіпкер бизнес жоспарын қорға таныстырып, шағын бизнесін одан әрі дамытуға ақшалай субсидия ала алады. Сондай-ақ, жоғары технологиялар министрлігіне қарасты  IT қоры жұмыс істейді. Жастардың IT саласы бойынша бизнес жоспары болса, олар ауқымды грантқа ие болуға мүмкіндік алады. Мемлекет жастарға барлық сала бойынша қолдау көрсетіп отыр», - деді ол.

    Қазақстанға тұңғыш рет келіп отырған жас маман халықаралық шараларда тәжірибе алмасуға мүмкіндік мол екенін жеткізді. Осы сынды шараларды өткізіп тұру екі тараптың да көкжиегін кеңейтетінін айтты.

    Өз кезегінде   Әзірбайжан Республикасы  Ұлттық   Жастар ұйымы кеңесінің  басқарма мүшесі, Еуропаның әзірбайжандық жас достары қауымдастығының президенті Гасым Хасмамедли Әзірбайжанда жастар саясатына мемлекет ерекше көңіл бөлетінін жеткізді.

    «Былтыр  алдағы  5 жылға жастар саясатын дамытуға бағытталған бағдарлама қабылданды. Ол құжаттың ішінде жастарды барлық сегмент бойынша дамыту бағыттары көрсетілген. Жастар қоры да жастарды белсенді қолдауға бағытталған ұйым. Ол идеясы бар жастар ұйымдары мен жеке тұлғаларға грант бөлуді қарастырады. Сондай-ақ, шетелде білім алғысы келетін жастарға да грант бөледі. Бұл біздің жастарды халықаралық тәжірибемен алмасып, мәдениаралас қарым-қатынасты дамытуға мүмкіндік береді», - деді Г. Хасмамедли.

    Ол айтып өткендей, Қор жастардың халықаралық ұйымдарында да тәжірибе алмасуына мүмкіндік береді.

    «Еуропаның әзірбайжандық жас достары қауымдастығы  жастардың  халықаралық  тәжірибе алмасуына аса ден қойған. Жастар қалаған саласы бойынша ұзақмерзімді немесе қысқамерзімді уақытқа шетелдің кез келген елінде  тағылымдамадан өте алады», - деді ол.

    Айтып өткендей, екі күнге созылатын іс-шараға 35  елдің өкілі қатысып жатыр. Жалындаған жастар басын қосқан халықаралық шаралар тәжірибе алмасу мүмкіндігі өте зор.

    Халықаралық конференцияда Жастардың білім алу және жұмысқа орналасу мүмкіндіктерін нығайту, денсаулық сақтау саласындағы ақпаратқа, білімге және қызмет көрсетуге жан-жақты қолжетімділік, жастардың азаматтық, экономикалық және әлеуметтік мәселелерге толыққанды қатысу, жаһандану жағдайында жастардың мүмкіндіктері мен тәуекелдері тақырыптары  кеңінен талқыланады.

    Айта кетейік, форумға  Азия-Тынық мұхиты аймағынан парламент өкілдері, халықаралық  сарапшылар және ғалымдардың, мүдделі мемлекеттік органдар, азаматтық қоғам және халықаралық ұйымдар өкілдері, жас көшбасшылар қатысты.

    Аягөз Құрмаш

    Фото: Нұржас Жақсыбай 

Афиша

Мақтан тұтамыз!

Бокс

ГеннадийГоловкин

Бокс

СерикСапиев

Футбол

ФК
Шахтер

Коньки

АйдоваЕкатерина